"Unidá" va presentase en Xixón con Pablo Rodríguez de candidatu

La coalición Unidá, integrada polos partíos Izquierda Asturiana (IAS), Andecha Astur y Los Verdes-Grupu Verde, entama a presentar les sos candidatures a conceyos dempués de presentar esta selmana a Ignaciu Llope como candidatu a la presidencia. D'esta manera, Unidá anunció ayeri que va concurrir a les próximes elecciones municipales de mayu nel conceyu de Xixón con una llista encabezada pol historiador y escritor Pablo Rodríguez Alonso, que ye tamién portavoz d'Izquierda Asturiana (IAS) en Xixón. El númberu dos de la llista xixonesa va ocupalu Carlos Moreno Garcia, miembru de la Executiva d'Andecha Astur.

La coalición Unidá, en palabres del so candidatu a l'alcaldía, busca "presentar una alternativa al actual bipatidismu PP-PSOE, y al so apendiz IU", un proyectu alternativu "a les polítiques depredadores pa col medio ambiente y la identidá asturiana que PSOE y PP aplicaren nos sucesivos gobiernos de los últimos años, y que suponga al empar una alternativa real al asturianismu y pseudecoloxismu d'IX".

El candidatu Pablo Rodríguez acusó al gobiernu municipal de "malgobernar Xixón, actuando d'una manera despótica y d'espaldes a la ciudadanía, y atacando a les voces que protestaron xustamente contra la política del PSOE" recordando los casos de "les protestes de la zona rural contra un PGOU demencial, les de los vecinos de San Andrés contra la faraónica ZALIA o la impresentable denuncia contra los sindicalistes Carnero y Morala."

La llista electoral completa d'Unidá pa Xixón va presentase nos próximos díes, y nella "van incluyise persones independientes que provienen d'ámbitos como l'asturianismu cultural, l'ecoloxismu y la izquierda".