UNIDÁ denuncia énte la Xunta Electoral al alcalde de Siero "por presuntu delitu electoral"

La coalición UNIDÁ, integrada por Andecha Astur, Izquierda Asturiana y Los Verdes ta acabante de denunciar por delitu electoral énte la Xunta Electoral al alcalde socialista del conceyu de Siero, Juan José Corrales, pol unvíu a los sierenses residentes fuera d'Asturies xunta a la revista "Pueblos y Gentes de Siero" d'una carta na que, en palabres del candidatu de la coalición Ignaciu Llope, faise "un actu de propaganda electoral col que l'alcalde intenta inducir el votu de los residentes ausentes, algo prohibío espresamente pola xurisprudencia reiterada de la Xunta Electoral Central”.

UNIDÁ denuncia que l'alcalde espresa nesa carta'l deséu de qu'esta comunicación “no sea la última” nuna clara alusión a la intención de renovación de l'alcaldía por parte del firmante. Esti tipu d'actuaciones, afirmó Llope, “tan claramente prohibíos pola llexislación electoral yá que supon una mera autopromoción del alcalde y de la so candidatura y nun tien nengún oxetivu informativu nin ye d'interés xeneral pa los vecinos”.

Por ello, la coalición formada por Andecha Astur, Izquierda Asturiana y Los Verdes-Grupo Verde solicitó a la Xunta Electoral qu'estudie los conteníos de la publicación y la carta que adxunta con ella “pa que se suspenda'l so unvíu y se sancione a los sos responsables pola comisión d'actuaciones contraries al espíritu y la lletra de l'actual llexislación en materia electoral”.

Finalmente'l candidatu d'UNIDÁ a la presidencia de la Junta General, Ignaciu Llope afirmó que “estes actuaciones a les que nos tien avezaos el PSOE son una muestra más de la corrupción estructural que dende les estructures de poder s'intenten insuflar na sociedá asturiana, tracamundiando lo público colo privao, y fomentando la cultura del 'val too' pa mantener les redes clientelares que sofiten el réxime arecista”.