Unidá afirma que 22 empreses tán llamaes a declarar pol casu del llibru "Cobstruyendo Asturias"

La coalición política nacionalista Unidá dio anuncia de la recepción d'una notificación xudicial na que s'esplica qu'un total de 22 empreses qu’inxertaron la so publicidá na publicación “Construyendo Asturias” tán llamaes a declarar énte’l xuez a traviés de lo sos representantes. “Construyendo Asturias” un llibru que se repartió de baldre nes cases de miles d'asturianos na seronda del 2006, yera una publicación a tou color na que se facía una descripción allabanciosa de les polítiques entamaes dende'l gobiernu asturianu. El llibru nun presentaba más autoría que la de la empresa "avenida gráfica" una imprenta de Leganés (Madrid).

Según la notificación que recibieron los representantes d'Unidá, que punxeren nel so día una denuncia pa investigar la responsabilidá de l'autoría del llibru propagandísticu y esclariar los mecanismos de la so financiación , el próximu día 10 d’ochobre, dende les 10:30 hores de la mañana va llamase a declarar a los representantes de CEYD, Sedes, OHL, Ferrovial, UTE UCA, Coprosa, FCC, Magna Global/Acciona, Dragados, y Alvargonzález (per esti orde), y pente medies d’exhortu van facelo los representantes de SACYR, Aucalsa, Itinere, Espina Obras, Alcuba, Procoin, Proastur, Oliastur, Viastur, Hnos. Sampedro, A. Pumarín y Contratas Iglesias.

Per otru llau, siguiendo’l conteníu y los pidimientos realizaos na denuncia presentada nel so día, el xuez tamién requier a les empreses Stockimágenes pa qu’apurra nomes y domicilios de les persones que tuvieron la iniciativa de la edición, les que fixeron les entrevistes y la recopilación de datos y les que proporcionaron los datos publicaos; a Punto Cero pa qu’indique les persones que fixeron la captación y contratación de los anuncios, y a Tasitrans pa qu’apurra los datos sobre la contratación del tresporte de los llibros de “Construyendo Asturias”. Amás, a estes tres empreses requierles el xuez pa qu’apurran la documentación contable qu’obre nel so poder sobre los pagos o cobros respectivos a que se refier la denuncia.

Dende Unidá afirmen tar "a la espera de conocer el conteníu de la declaración del representante d’Avenida Gráfica".