Unión URAS-PAS y Bloque por Asturies-UNA celebren esti vienres el pieslle de campaña en Xixón

Dos de les tres formaciones asturianistes que participen nes eleiciones, Unión URAS-PAS y Bloque por Asturies-Unidá Nacionalista Asturiana (BA-UNA), van pesllar la campaña eleutoral con actos en Xixón. Tamién esti vienres, la candidatura llocal Conceyu d’Unidá Popular de Xixón (CUPX) va celebrar un actu pa zarrar la campaña, que fina a les 00 hores d’esta madrugada.
 
El Centru Municipal Integráu de L’Arena ye la sede escoyida por Unión URAS-PAS pa celebrar un mitín a les 20 hores. Nél va participar Xuan Xosé Sánchez Vicente, candidatu de la coalición a la presidencia d’Asturies, que va tar acompañáu por Sergio Marqués, presidente d’Asturies ente 1995 y 1999. Tamién van participar nel actu Javier López, presidente d’Unión Renovadora Asturiana (URAS), y Margarita Cabana, candidata de la coalición a l’alcaldía de Xixón.
 
El colexu d’El Llano va ser sede del actu final de campaña de Bloque-UNA, tamién a les 20 hores. Rafael Palacios, candidatu a la presidencia d’Asturies a la coalición, y Yolanda González Huergo, vocera de la formación nacionalista, van participar nesti actu xunto con candidatos, militantes y simpatizantes. Tres les intervenciones polítiques va celebrase una espicha.
 
Mentes, el CUPX, formación de carauter llocal integrada por Conceyu Abiertu, Izquierda Anticapitalista y Frente de la Izquierda, tien previsto un actu políticu y una folixa fin de campaña nel colexu Xovellanos, con entrada pela cai Begoña. Ésti va principiar a les 19 hores coles intervenciones de los representates de los tres partíos d’izquierda, pa depués dar pasu a les actuaciones musicales de Taranus, Raíces SonKoy y 2&2.