Unes xornaes de percusión recuerden en Noreña al músicu Chema Fombona

L’Asociación Memorial Chema Fombona entama en Noreña unes xornaes n’alcordanza del popular batería, fináu n’avientu del 2015 a los 46 años por un infartu mientres ponía clase. El primer Memorial Chema Fombona tien como fin entamar actividaes al rodiu la percusión y la figura del músicu de Los Berrones o Vaudí.

El 28 d’abril del 2017 creóse en Noreña una asociación pa la memoria y reconocimientu de Fombona nel que participen más de 70 promotores entre compañeros del mundiu de la música, amigos y familiares del que nel momentu de la so muerte yera batería de Los Berrones. La so finalidá principal ye l’entamu “añal d’un Memorial como reconocimientu a la so gran trayeutoria profesional y n’alcordanza de la gran persona que foi”, certame que yá ye una realidá.

Talleres, clinics, conferencies, ponencies, conciertos y otres actividaes al rodiu la percusión conformen el programa del primer Memorial Chema Fombona, qu’abre esta tarde la esposición ‘Historia del tambor n’Asturies y Europa’, con fondos del percusionista Manuel Durán y del Muséu del Pueblu d’Asturies, na sala Antonio Mingote. La so inauguración ta prevista pa les 20 hores y va tar abierta al públicu hasta’l sábadu.

Media hora más tarde, nel salón d’actos de la Casa Cultura Severo Ochoa, Carmen Escorihuela y Julio Sanchez-Andrade, profesora de grau superior y xefe de departamentu del Conservatorio Superior de Música ‘Eduardo Martínez Torner, de manera respeutiva, van lleer el panexíricu ‘Chema Fombona: collaciu, compañeru y intérprete’. Pue consultar el programa completa d’estes xornaes de percusión nel documentu axuntu a esta noticia.