UNA y XA posiciónense sobre la sentencia del TSXA

UNA y Xuventú Asturianista tamién se posicionaron en rellación a la sentencia del TSXA sobre l’asignatura de llingua asturiana na ESO. UNA critica la reacción del Conseyeru d’Educación y la mocedá del PAS celebra “una derrota más d’Areces”.

Dende la estaya d’Educación d’Unidá Nacionalista Asturiana denunciaron que’l recursu anunciáu pol Conseyeru d’Educación y Ciencia, Herminio Sastre, “pretende siguir marxinando la llingua asturiana”.

"Nun ye una rempuesta que nos sorprenda. El Gobiernu asturianu lleva años faciendo lo indecible porque la Llingua Asturiana nun pueda impartise con normalidá nel sistema educativu", critica UNA, añadiendo que “l’únicu oxetivu” del Gobiernu “ye non solo marxinar sinón directamente acabar col patrimoniu llingüísticu de tolos y toles asturianes".

Nesti sen tacharon de “intransixente y antiasturiana” l’actitú de Sastre y proponen que pa que l’asturianu tenga normalidá na educación tien que “formar parte de les asignatures instrumentales”, incluyise “de plenu drechu” na Educación Infantil y crease la especialidá de llingua asturiana, cola convocatoria d’oposiciones pa “equiparase a la situación de los docentes del restu d’especialidaes”.

“Fracasu d’Areces”
Per otru llau, Xuventú Asturiana celebró la sentencia del Tribunal Superior de Xusticia d’Asturies porque, según ellos, amuesa “un fracasu más d’Areces” y la so xestión na que “nos sos doce años de gobiernu nun buscó más que l'acabar cola llingua asturiana”.

“Esperamos que’l Gobiernu de PSOE y Izquierda Xunida, termine con esta vergoñosa decisión pola que l'asturianu tuvo tovía más en peligru nestos años”, señalen les mocedaes del PAS. Tamién esixen “l'acatamientu inmediatu de la sentencia y un cambiu nes sos polítiques d'aniquilación de la nación asturiana”, a la par qu'una meyora llaboral de la “situación llamentable que viven los profesores d’asturianu”.