Una xuez declara nulu’l nomamientu de Cuesta como direutor del Muséu Etnográficu de Grandas de Salime

El Xulgáu de lo Contencioso-alministrativo númberu 6 d'Uviéu declaró nulu’l nomamientu de Francisco Cuesta Toribio como direutor del Muséu Etnográficu de Grandas de Salime. D’esta forma, el xuez estima’l recursu de Pepe ‘El Ferreiro’.
 
Según la sentencia a la que tuvo accesu Europa Press, y que pue recurrise n'apelación nel plazu de 15 díes, “la relación llaboral especial d'alta direición sobre'l direutor del Consorciu pa la Xestión del Muséu Etnográficu de Grandas nun desime del cumplimientu de los principios de publicidá y concurrencia, y ello esixe una convocatoria previa y dar publicidá a la mesma, dientro del correspondiente procesu selectivu”. La maxistrada Belén Alicia López entiende, coles mesmes, que correspondía a l'Alministración demandada acreditar que se cumplieron los principios qu'han de rexir dichu procedimientu previu a la designación de la persona qu'ha desempeñar tal cargu. “Prescindiendo de forma total del procedimientu establecíu, procede declarar la nulidá del  alcuerdu en cuanto al nomamientu del direutor nuevu”, argumenta.
 
Amás, la xuez defende que José María Naveiras, Pepe ‘El Ferreiro’, sí s'alcuentra lexitimáu pa impugnar el nomamientu, dao que “de siguise'l procedimientu conforme a los principios de publicidá y concurrencia podría presentar la so solicitú a dichu cargu y optar al mesmu”. Amás d'ello, recuerda que'l despidu unillateral d’El Ferreiro declaróse “improcedente”. El recursu qu'agora estima'l xulgáu uviedín interpúnxolu l’ex direutor del Muséu Etnográficu de Grandas de Salime’l 20 de xunetu del 2010 al entender que'l nomamientu de Cuesta, con fecha del 8 d'abril del 2010, “nun siguió nengún procesu llegal de seleición” y ye, polo tanto, “contrariu a derechu”.