Una visita de 24 hores a la UABRA

La Universidá Asturiana de Branu (UABRA) ye un fervedoriu de xente con ganes d’aprender y vivir n’asturianu. Asturies.com pasó 24 hores na Escuela-Hogar de Cangas del Narcea pa compartir esta esperiencia con profesores y alumnos.
 
L’actividá nel edificiu qu’acueye a les 170 persones que pasen pela UABRA a lo llargo de los 13 díes de duración de los cursos principia bien ceo. Poco más tarde de les 8 hores yá se pueden sentir los primeros móviles sonar a mou de despertador y la xente principia a llevantase pa dir camín de la ducha col oxetivu d’espabilar y nun llegar tarde al almuerzu, que se sirve a partir de les 8.45 hores. Ye miércoles y cuesta más salir de la cama porque munchos allargaron la folixa la nueche anterior gracies a la idea d’Iniciativa pol Asturianu d’entamar un karaoke n’asturianu na discoteca Zaycor, asitiada a unos 100 metros de la Escuela-Hogar, nes afueres de Cangas. La práutica totalidá d’alumnos y profesores averáronse a esti llocal hosteleru pa nun perdese les habilidaes de los cerca de venti ‘valientes’ que s’atrevieron col micro, lo qu’amuesa’l bon ambiente que se vive na Universidá Asturiana de Branu.
 
Un café o un ‘cola-cao’ acompañáu d’un poco de pan untáu sirve pa garrar fuercies énte les cerca de seis hores de clases que-yos espera a los escolinos y escolines de la UABRA. Asina, sobre les 9.20 hores, la ponte que salta’l ríu Narcea y que lleva al IES de Cangas, enllénase d’alumnos dispuestos a ampliar los sos conocimientos d’asturianu, los que tán apuntaos al elemental y al avanzáu, o sobre la música tradicional del país, aquellos qu’apostaron pol cursu d’afondamientu cultural y llingüísticu entituláu ‘Cantares, bailles ya instrumentos musicales asturianos’, la mayoría veteranos d’otres ediciones de la UABRA o inclusive d’Ibias. Mentes, los inscritos nel otru cursu d’afondamientu, el de ‘Ecoloxía y Medioambiente n’Asturies’ desplazábanse hasta Munieḷḷos pa pasar el día y facer una ruta xunto con Carlos Lastra.
 
A les 9.30 hores dan entamu a les clases, que se dividen en dellos módulos impartíos, caún d’ellos, por un profesor diferente. Asina, a primer hora, los escolinos y escolines d’elemental principien esti miércoles con una hora de Gramática, mentes qu’a los d’avanzáu toca-yos dar Llingua Asturiana Estándar. Pela so parte, los de música tradicional abren el día con Metodoloxía de Recoyida de Material Oral. Les clases son amenes, abiertes y participatives, dalgo a lo qu’ayuda la cercanía qu’amuesen los maestros y les ganes d’aprender que traen los alumnos. Los pupitres de toles aules sitúensen en forma de ‘U’, quedando la zona central pal profesore. Un descansu de media hora, a les 11.30 hores, y dos hores más de clase allarguen la xornada a les 14 hores. Vuelta a cruciar la ponte y comida enriba la mesa a partir de les 14.15 hores. Pa xintar hai sopa de fideos y garbanzos, non mui bien recibíos pol calor grande de la xornada –la temperatura superaba los 30 graos–. Sicasí, la meyor pante de les fontes quedaron vacíos. La fruta del postre ayudó a refrescar un poco.
 
Tres la xinta, llega’l tiempu de descansu. Unos aprovechen pa baxar a Cangas, mentes qu’otros, quiciabes los que más allargaron la nueche’l día anterior, apuesten por una siesta. Nun hai clase hasta les 17 hores, pa los d’afondamientu, y hasta les 18 hores, pal restu, pero los escolinos y escolines de música tradicional anden más que contentos. A les 16 hores quedaron na puerta de la Escuela-Hogar pa tirar hacia Vidal xunto con Ambás pa conocer a Binita ‘i Xuacu, una informante fabricante de pandeiros. Ehí pasaríen la tarde sintiéndola cantar y tocar.
 
Pela tarde, les clases duren hasta les 20 hores, momentu nel que los profesores s’axunten pa facer un siguimientu de les incidencies de les clases, d’estudiar la progresión de dalgún alumnu que pueda amosar dalguna dificultá p’absorber tolos conocimientos, o d’entamar estratexes pa correxir desaxustes, ente otros asuntos. Mentes, los escolinos y escolines prepárense enantes de la cena, prevista pa les 21 hores. Nesta ocasión toca una ensalada y tortiella, amás del postre. Tres enllenar l’estómagu, toca conciertu d’Héctor Braga nel Teatru Toreno dientro de les xeres complementaries qu’entama la direición de la UABRA tanto pa la xente que participa nos cursos como na población de Cangas. Nun hai momentu p’aburrise na Universidá Asturiana de Branu, una esperiencia que paga la pena vivir.