Una terminoloxía del teatru y les artes escéniques, undécima propuesta de TermAst

Belarmino Daniel Álvarez y Antón Caamaño son los responsables de la undécima propuesta del proyeutu TermAst de l’ALLA: ‘Terminoloxía de Teatru y Artes Escéniques’. La institución ta acabante d’espublizar dos llibros.

Estos direutores d’escena afrontaron el retu de recoyer términos venceyaos al mundu del teatru y de les artes escéniques “porque apoyar el teatru asturianu nun ye sólo facer una comedia n’asturianu”, señala Caamaño. Asina, ellaboraron un pallabreru formáu por alredor de 1.200 términos que, al final, quedaron reducíos a un millar pa que’l conxuntu tuviera más sentíu. Sicasí, estos nun queden pa prau y podríen recuperase pa terminoloxíes venceyaes a la música, la ópera y el doblaxe qu’Álvarez y Caamaño nun descarten facer nun futuru próximu.

El proyeutu TermAst ye una iniciativa conxunta de l’Academia de la Llingua Asturiana (ALLA), el coleutivu Softastur y el Colexu Oficial d’Inxenieros n’Informática del Principáu d’Asturies. Ésta tien como oxetivu recoyer iniciatives individuales o grupales de propuestes terminolóxiques en campos de los que sían especialistes, dexando estes pallabres al serviciu de los profesionales y falantes, que podrán, o non, faceles propies y da-y usu. Darréu, será la institución académica la que dirá inxiriéndolos dientro de los sos calces normativos.

Na ‘Terminoloxía de Teatru y Artes Escéniques’, Álvarez y Caamaño ufren una bayurosa llista de términos que van dende ‘abaxo’ (“Primer términu, parte del escenariu más averada al públicu”) a ‘zarzuela’ (“Obra teatral que se representa falada, cantada y acompañada de música; Música qu’acompaña a una obra teatral que se representa cantada y falada; Soxéneru teatral musical o opereta procedente de Madrid representáu con diálogu y cantu”). Decenes de pallabres que los profesionales de la escena y los aficionaos al teatru yá pueden consultar na web de TermAst.

Dos espublizaciones

L’ALLA anunció esta selmana la espublización de dos llibros. El primeru trátase de la obra ganadora del Premiu Llorienzu Novo Mier de Creación Lliteraria 2011, ‘La mano vacía’, de Héctor Pérez Iglesias. Ésti suma’l númberu 47 de la coleición ‘Llibrería académica’. La otra novedá ye la salida a la venta de la quinta edición de ‘El principín’, el clásicu d’Antoine de Saint-Exupéry, con motivu del trixésimu aniversariu de la so edición n’asturianu. Nel 1983, Xosé Lluis García Arias encargóse de la torna d’esta novela xuvenil cola collaboración de Marta Suárez Estrada, que sumaba’l títulu númberu 7 de la coleición ‘Escolín’.

Na semeya, actores de Producciones Nun Tris tres representar 'Xuanón namoráu', ente ellos Caamaño –terceru pela derecha–.