Una teoría afonda nel aniciu del Pericote de Llanes

La revista dixital "Idiófonos" qu'asoleya'l "Gabinete d'Estudios Etnográficos, presenta na so última actualización la primer parte d'un estudiu pal que se promete que va tener continuación y nel que los musicólogos y etnógrafos Fernando M. de la Puente Hevia y Mª Isabel Álvarez Álvarez afonden nel aniciu del pericote, el baile llaniscu por escelencia.

Nel estudiu, Puente Hevia y Álvarez acuden a fontes documentales escrites y cróniques del sieglu XIX que demuestren como se baillaba'l pericote n'otros llugares del oriente asturianu y incluso en tierra de Cantabria, conseñando toles variantes estilístiques que presentaben estos otros pericotes que se baillaben y que se baillen en llugares como Carreña o Tresviso en comparanza col actual que se fai na villa de Llanes.

La voluntá del estudiu de los dos musicólogos ye la d'afondar nos oríxenes d'esti baille, dalgo que grandes estudiosos del sieglu XX como'l mesmu Menéndez Pidal yá dicíen que yera poco menos qu'imposible, en cuantes que'l pericote yá lleva na forma so actual de baille escenificáu delantre d'un públicu cerca de 100 años. Los autores espliquen nesti sentíu como'l documentu filmáu más antiguu que se tien del baille del pericote ye del añu 1917 y como na película que se conserva na Filmoteca d'Asturies lo que se ve nun s'estrema muncho del pericote d'anguaño, ello ye, "una reproducción de movimientos y desplazamientos cara a un públicu que nun participa del eventu más que como observadores".

L'ausencia dafechu de fontes documentales que permitan afondar más nel orixe del Pericote y que yá conseñaron otros estudiosos del tema nun dexa afitar nada con seguranza, pero los autores del estudiu yá adelanten que pa ellos el pericote que se fai anguaño en Llanes, constitú una versión mui evolucionada y remocicada de dos bailles populares que se desarrollaron nel oriente asturianu y que son la la xirandiya na primer parte de la representación y el pericote mesmu como conclusión de la escenificación. Fernando M. de la Puente Hevia y Mª Isabel Álvarez Álvarez dan anuncia de que van esplicar los por qués d'esta teoría personal nuna segunda parte del estudiu.
Más información na revista "Idiófonos"