Una suspensión con munchos interrogantes

|
Logu 50 aniversariu Muséu del Pueblu d'Asturies

L'actu previstu pa celebrar el cincuentenu aniversariu del Muséu del Pueblu d'Asturies nun se celebró y les esplicaciones sobre los motivos nun acaben de convencer.

La versión más repetida dende'l Conceyu de Xixón ye l'apaición d'un ñeru d'aviespa asiática, pero la oposición nun la considera creíble. Asina, Xixón Sí Puede asegura que se dieron hasta cuatro argumentos dende la tarde del vienres pa xustificar un actu al que l'alcadesa Carmen Moriyón nun diba a acudir p'asistir al LXXXII Descensu Internacional del Seya, lo qu'otros grupos calificaron de xestu eleutoralista de cara a liderar la candidatura de Foro a les Nacionales del añu qu'entra.

"La primera, razones ayenes al equipu de gobiernu; la segunda, razones téunicas; la tercera, por una indisposición d'una persona central nel actu, y la cuarta, por un ñeru d'aviespes. Toes y caúna d'elles demostráronse absolutamente falses, sobre manera la cuarta depués de que diferentes persones verificaren que'l ñeru d'aviespes fora llocalizáu depués de la hora na que taba prevista la celebración”, afirmó Mario Suárez de Fueyo, voceru de la candidatura de xunidá popular.

Los cuatro grupos na oposición esixen a Foro esplicaciones sobre los motivos reales de la suspensión de los actos nuna fecha tan importante pa la cultura asturiana como esti aniversariu, asina como responsabilidaes polítiques.

Contador Estadistiques