UNA súmase a la manifestación del día 1 contra los recortes

Los sindicatos CSI, SF, SUATEA y CGT convoquen pal 1 d’avientu una manifestación en Xixón contra los recortes y la reforma llaboral. UNA va sumase a esta movilización pa “reivindicar una respuesta asturiana a la crisis”.

“¿Vas aguantar otra vuelta de tuerca?” ye’l lema col que los sindicatos CSI, SF, SUATEA y CGT van percorrer les cais de Xixón, el próximu 1 d’avientu a les 19.30, nuna manifestación contra los recortes, la privatización de la sanidá, la reforma llaboral y la llei d’estranxería.

Unidá Nacionalista Asturiana vien d’amosar el so apoyu a la convocatoria y confirmar la so participación nella. Los nacionalistes recuerden que “l’autollamada esquierda plural aprobó ún de los mayores recortes de toles CC.AA”, y llamen a tola xente asturiano a movilizase “pa glayar non a esta otra vuelta de tuerca”.

“Consideramos qu'esta manifestación ye una bona amuesa d'esa respuesta que tenemos que dar les asturianes y los asturianos énte una crisis financiera que se convirtió, cola complicidá de los gobiernos central y asturianu, nuna crisis del emplegu y sobre la viabilidá del estáu social”, sentencia UNA sobre’l so apoyu a esta convocatoria.

“Conciertacción”
Per otru llau, mientres el percorríu de la manifestación, los grupos asturianos de hiphop K-Nalón y Arma X van dar un conciertu enriba d’ún camión sonorizáu qu’acompañará’l camín de los manifestantes.