Una recreación de la batalla de Cuadonga con clicks, nel Arqueolóxicu

Les fines de selmana de branu va haber visites guiaes de baldre en castellanu al muséu uvieín.

El Muséu Arqueolóxicu d'Asturies acueye una cuidada recreación de la batalla de Cuadonga fecha con clicks de Playmobil destinada al públicu infantil que forma parte del programa cultural Cuadonga 2022 polos 1.300 años de la efeméride. Los sos autores son Juan Luís Díez Martínez y Juan Luis Alonso Aristizábal, entrambos profesores y aficionados a la historia, que pretenden difundir dalgunos de los episodios más importantes del nuesu pasáu, y supón un gran reclamu pal públicu infantil.

La entrada pa visitar el diorama ye de baldre, al igual que les visites que se van entamar de baldre esti branu a la coleición permanente del muséu. Van ser los vienres, sábadu y domingu hasta'l 30 de setiembre con un llargor de 50 minutos y un máximu de 10 persones por grupu, polo que se recomienda acutar plaza nel teléfonu 985.20.89.77.

Los horarios son los siguientes: vienres y sábados, a les 11, 13 y 17 hores; y domingos, a les 11, 12.15 y 13.30 hores. Esta iniciativa forma parte de les actividaes divulgatives de branu del Arqueolóxicu p'averalu a la ciudadanía.