Una propuesta d’ERC propón que gallegu, vascu y catalán sían oficiales en tol Estáu

Esquerra Republicana de Catalunya (ERC) dio anuncia de que va presentar en Congresu de los Diputaos d'España una propuesta de llei pela que, amás del castellanu, el catalán, el gallegu y el vascu van tener calter de llingua oficial nel Estáu español. El presidente d'ERC, Josep-Lluís Carod-Rovira presentó la iniciativa esti fin de selmana na Universidá Catalana de Veranu que se celebra en Prada (Francia).

La propuesta d'ERC pretende qu'estes trés llingües sían tamién oficiales nos ámbitos de competencia que tean acutaos esculsivamente al Estáu y qu'asoceda otru tantu nes instituciones estatales comunes a tol territoriu español, incidiendo nes alministraciones de xusticia o l'etiquetao de productos. Los medios de comunicación tamién se veríen afectaos pola llei, que propón que les emisores de radio y televisión públiques y tamién les particulares qu'emitan pa tol estáu faigan la metada de la so programación nes llingües oficiales minoritaries, yá fuere per aciu de desconexones territoriales o per canales d'audio estremaos.

Dende'l PSOE apaecieron yá voces contraries a la llei que proponen los nacionalistes catalanes, y el mesmu Carod Rovira reconoció na presentación del proyectu que nun contaba con que s'aprebare anque sí qu'esperaba que s'almitiere a trámite. En cualquier casu, de salir alantre la propuesta, alteraría en grande'l panorama llingüísticu del estáu, un asuntu sobre'l que convidamos a falar a los nuestros llectores en Conceyu Abiertu.