Una plataforma denuncia la política de festeyos del conceyu de L.lena

Dempués d'años d'enfrentamientos col conceyu de L.lena pola so política de fiestes, la plataforma "otres feries son posibles' que formen dellos de los colectivos culturales, de mocedá y musicales más representativos del conceyu de L.lena denunció nun comunicáu lo que calificó de "engañu" por parte del conceyu.

Según la plataforma, l'alcalde de L.lena, el socialista Hugo Morán tenía solicitú de los colectivos locales qu'integren l'agrupación pa tratar sobre estos asuntos dende va más d'un añu.

Énte la falta de rempuesta por parte del alcalde, la plataforma convocó una concentración de protesta, prometiendo entós l'alcalde aconceyar con ellos y facer cambeos nel diseñu del programa festivu "de manera que los colectivos pudieren aportar idees". Con too y con ello, la Plataforma denuncia que "entá a día de güei, nun nos convocó l'alcalde, qu'incumplió la so promesa de diálogu y tampoco hebo nengún cambéu". La Plataforma quier aprovechar les elecciones pa dar a conocer estos datos a la ciudadanía y enfótase en que, en pasando les elecciones y independientemente de quien les gane "tean dispuestos a ser más dialogantes que Morán y los sos conceyales" y que defendan "un modelu de xestión más participativa".