Una operación antiyiḥadista lleva a una detención en Xixón

Un ciudadanu marroquín de 34 años de nacionalidá española, Abdellah Ouelji Lafsahi, foi deteníu na mañana d'esti martes n'El Natahoyo dientro d’una operación antiyiḥadista n’Asturies y Euskadi. La Policía tomó les cais d'esti barriu xixonés y de La Calzada, onde tamién se rexistró una segunda vivienda.

Según les primeres informaciones, el mozu taba integráu nel órganu de captación del Estáu Islámicu n’Europa y buscaba'l reclutamientu de persones pa la llucha islamista qu’abandera esti grupu. Asina, dende’l so domiciliu na cai Rosalía de Castro emplegaba Internet y les redes sociales pa esti fin. La mesma función venía a facer l’otru deteníu de la operación, nesti casu en Donostia, un mozu marroquín de 20 años que taba llegal nel Estáu.

La detención fíxose a primer hora de la mañana, allargándose hasta pasaes les 13 hores el rexistru del domiciu de Lafsahi ente los glayíos de los sos familiares. Tamién se prodeció a revisar una segunda vivienda, nesti casu na cai Venezuela. L’amplia presencia policial alarmó a los vecinos, sorprendíos pol despliegue.