Una obra faraónica

Dende va dos años, cuando'l Ministeriu de Fomentu, al través del ente Puertos del Estáu, dio anuncia de que taba prevista una reforma del Puertu d'El Musel, les grandes entrugues taben en saber en que diba consistir esa ampliación y, sobremanera, pa que diba servir esactamente. Yá d'aquella les autoridaes enseñaron los planos xenerales d'un garapiellu de posibles alternatives, toes elles con un gran impactu na fachada costera. Ente elles rescamplaba la que venía numerada como "3c" que pasaba por ser la más grande y la más cara de toles propuestes. La 3C suponía multiplicar por cinco la superficie que tenía'l puertu, ganando cerca de kilómetros enteros de llinies d'atraque y cási cuatro metros de caláu.

La cosa quedó medio parada hasta que, a primeros d'esti añu, l'Autoridá Portuaria avisó de que yera precisamente l'alternativa 3C la que-y paecía más conveniente, anque seguía ensin sabese pa qué facía falta ampliación nenguna nel Musel. Cuando'l proyectu entró a fase d'información pública el 16 d'abril de 2002, media ciudá y media Asturies seguíen in albis sobre lo que pretendía facese, anque pronto salieron voces crítiques dende organizaciones ecoloxistes y partíos polítiucos estraparlamentarios, asina como de prestixoses persones independientes, ente les que cabe remembrar al ex-presidente del Principáu Pedro de Silva, que veíen nel proyectu una obra faraónica que podía enterrar el futuru desarrollu de la ciudá y atentar irreversiblemente contra la costa asturiana . Los técnicos que cuestionaben el proyectu destacaben enforma los graves errores y les faltes que tenía l'estudiu d'impactu mediuambiental qu'acompañaba a la obra, como, por poner un casu, que nun se contemplare nelli l'efectu del superdique nes marees y corrientes marines.Mientres, los partíos políticos con representación nel Conceyu de Xixón y na Xunta Xeneral del principáu tomaben les sos posiciones un poco a remuelque del debate que yá taba na cai. Mientres el PSOE, mayoritariu en Xixón y na Xunta Xeneral del Principáu, apoyaba ensin reserva nenguna l'ampliación, el PP defendía'l proyectu pero tamién decía tar preocupáu polos posibles efectos de la obra. Pela so parte, IX pasó seliquino del silenciu a l'abierta oposición al actual proyectu, que non a l'ampliación del Puertu. El silenciu de la URAS foi entovía más sepulcral, yá que nun se pronunciaron oficialmente hasta la esposición del proyectu na Xunta Xeneral del Principáu el 6 de xunu, pidiendo tamién la retirada del proyectu 3C.El plazu d'alegaciones qu'acababa'l 16 de mayu tuvo d'ampliase pol clamor popular hasta'l 3 de xunu, anque tamién esti segundu plazu ta cuestionáu y pue que tenga de dase más tiempu. A la fin, Xixón entregó más de 1.300 escritos protestando y poniendo alternatives a la obra'l superpuertu. Na situación actual, tal parez que l'alternativa 3C yá nun se tien, y tolos grupos políticos, menos el PSOE tan en contra d'ella, pero esti va ser un procesu llargu, neto que la obra, que llevaría unos 15 años, y hasta últimos d'esti añu 2002 nun se sabrá nada seguro.Estos son los recursos más importantes qu'hai na rede sobre'l Superpuertu d'El Musel:Web de l'Autoridá Portuaria de Xixón (inclúi una presentación del proyectu y un resume del estudiu d'impactu mediuambiental)Web de José Luis Acuña, Doctor en Bioloxía y Oceanógrafu de la Universidá d'Uviéu. (contrariu al Superpuertu, inclúi un modelu pa presentar alegaciones y simulaciones sobre l'efectu de la obra)Web Especial de l'asociación ecoloxista Green sobre l'ampliación d'El Musel
(inclúi los principales testos d'alegaciones presentaes al proyectu)