Una muyer desapaecida y trés feríos pola rotura d’una canal d’agua de la llétrica E.ON en Cabrales

Na nueche del miércoles la desgracia asentóse en Cabrales. La rotura d’una canal d’agua de propiedá de la llétrica E.ON provocó una riada qu’arrastró roques, afeutando a dos viviendes. Una muyer de 77 años ta desapaecida.

El Centru de Coordinación d’Emerxencias del 112-Asturies recibió delles llamaes, la primera a les 23.50 hores d’ayeri. Nella indicaben que reventara la canal d’una presa y que taben inundándose delles cases na zona de Valdelabarca. Depués añadieron que nun podíen abandonar les viviendas y qu’había desprendimientos de piedres sobre al menos una d’elles. Creíen qu’una persona taba desapaecida. El conseyeru de Presidencia, Guillermo Martínez, activó a les 01.24 hores el Plan Territorial de Proteición Civil del Principáu d’Asturies (PLATERPA) en SITUACIÓN 1, na que s’enmarquen aquelles emerxencias llocalizaes que pa solucionar ye necesario la movilización de medios ayenos a la zona.

Tras llegar al llugar, los bomberos desplazaos dende’l parque de Cangues d’Onís indicaron que taba cayendo muncha agua y arrastrando barru. L’accesu a la zona afeutada yera complicao. Sicasí, procedieron al rescate de les persones que se vieron sorprendíos pola riada. Según los datos facilitaos pol Serviciu d’Atención Médica Urxente (SAMU), tres persones tuvieron que ser treslladaos al Hospital de Les Arriondes. Dos de los feríos, una muyer de 79 años d’edá d’iniciales J.M.R. y  un varón de 81 años, J.P.I., nun presentaben peligru; el terceru, un home de 55 años, S.D.L., presentaba, a espenses de más pruebes y hasta nueva valoración médica, pronósticu reserváu. Mentes, una cuarta persona, una muyer de más de 80 años, sigue desapaecida.

Téunicos de la llétrica trabayen nel llugar

Dellos téunicos de la compañía E.ON trabayen dende primer hora d’esta mañana pa intentar determinar la rotura de la canal. En declaraciones a la Cadena SER, el teniente alcalde del Conceyu de Cabrales, Francisco González, presente tola nueche nel llugar del socesu, esplicó que l’agua arrolló dos cases y que dos queseríes quedaron mui dañaes, "tapaes por barru y folla". Señaló que dende’l so domicilió sintió nel momentu de la rotura un "ruíu fuerte", que-y estrañó, marchando la lluz darréu.