Una manifestación xunitaria “pola soberanía y el cambiu social” va protagonizar el Día d’Asturies

Compromisu, Conceyu Abiertu, Andecha Astur y Izquierda Anticapitalista convoquen, col sofitu de dellos coleutivos, una manifestación “pola soberanía y el cambiu social” nel Día de la Nación Asturiana. Xixón va ser la sede de la marcha.

Baxo’l nome de ‘Asturies decide: pola soberanía y el cambiu social’, estes organizaciones pretenden convertir el Día de la Nación Asturiana nun “día de llucha pa reivindicar qu'Asturies tien que decidir el so futuru, faciendo exerciciu de la so soberanía al traviés de la participación ciudadana dende abaxo, pa lluchar pol necesariu cambéu social, que convierta la política nun preséu al serviciu del 99 por cientu de les persones”. Nun comunicáu, recuerden el desaniciu industrial que ta viviendo’l país, faciendo referencia especial al casu de la minería, “que nes caberes trés décades pasó de tener más de 40.000 trabayadores a los 3.000 que malapenes tien anguaño”, pa darréu denunciar la “delictiva ‘xestión’ institucional, empresarial y sindical del desaniciu de la minería y la so pretendida reconversión al traviés de los multimillonarios ‘Fondos Mineros’, que valieron pa la creación d’una rede clientelar de la que se sirvieron de mena especial el PSOE –como principal partíu gobernante n’Asturies y nes zones mineres– y los sindicatos SOMA-UGT y CC OO, amás d’empresarios como Victorino Alonso, con práutiques delictives y d’esplotación llaboral más que conocíes”. Tampoco’l PP nun se llibra de les crítiques, yá que consideren al Gobiernu estatal culpable d’acelerar “al máximu'l procesu de zarru de la minería, poniendo a Asturies nuna situación insostenible llaboral y económicamente”.

“Al sometimientu económicu hai qu’amestar la situación d’opresión nacional sufrida por Asturies, que ve cómo dende les instituciones de gobiernu se marxina y reprime toa espresión cultural, llingüística, o de cualquier otru calter, que seya d’orixe asturianu. La non oficialidá de la llingua asturiana y la falta de derechos de los sos falantes, o les constantes agresiones al patrimoniu históricu, arquitectónicu, arqueolóxicu, etc., son fechos que venimos careciendo con toles formaciones polítiques que caltuvieron el poder n’Asturies, llámense PSOE, Foro, IU, PP o la reciente complicidá gubernamental d’UPyD. Asina, l'ausencia de toes elles nel procesu xudicial del ‘casu Marea’, el mayor casu de corrupción de la política asturiana, ye una bona amuesa d'ello”, continúa’l comunicáu robláu por toles formaciones, que reclamen “nuevos procesos constituyentes frente al fracasu históricu de la mal llamada ‘Transición’, y la puesta en cuestión del réxime surdiu del mesmu, al traviés de procesos dende abaxo y empobinaos a llograr la máxima participación nel mesmu, abandonando esi engañu que supón la representación política, el partidismu profesionalizáu, les élites gobernantes coles que non nos identificamos y munchos menos nos representen, y apostando por formes de democracia direuta”.

El centralismu conservador creciente, los recortes nos servicios sociales, les agresiones ecolóxiques, la opresión llingüística y cultural, y la situación de la mocedá, ensin trabayu y obligada a emigrar, son otros aspeutos que reciben crítiques dures polos convocantes, que consideren “necesario articular una rempuesta popular, que dende posiciones asturianes y tresformadores, seya quién a da-y la vuelta a la situación, ufriendo una alternativa al sistema económicu actual, a les cinco fuercies del arcu parllamentariu asturianu –que nun son más qu’un brazu más del aparatu institucional– y a les burocracies del sindicalismu mayoritariu, col so papel d’inmovilismu y desmovilización de la clase obrera”. D’igual forma, ven necesario “superar un sistema económicu caducu a tolos niveles, escontra’l que non sólo hai qu’oponese, sinon tamién hai qu’ufrir una alternativa que mos garantice la xusticia social, y dea igua a la opresión nacional, de clase, de xénero o cualquier otru tipu de dominación”.

El domingu, a les 12.30 hores

La manifestación conxunta con motivu del Día de la Nación Asturiana va tener salida a les 12.30 hores de la Plazuela San Miguel, en Xixón. La Corriente Sindical d’Izquierda (CSI), Darréu, el Centru Social Autoxestionáu La Semiente y la Xunta Estudiantil Asturiana son los coleutivos que sofiten la convocatoria.