UNA llamenta que la crisis tamién la pague la Llei de Dependencia

UNA amosó’l so esmolecimientu pola aplicación de la Llei de Dependencia n’Asturies. Los nacionalistes critiquen que 4.569 asturianos tienen reconocida dalguna prestación “ensin que l’Alministración determine les condiciones de l’ayuda”.

Faustino Zapico, portavoz d’UNA, calificó de “llamentable” el fechu de que n’Asturies haiga 4.569 asturianos que, teniendo reconocíu’l derechu a dalguna prestación en rellación a la Llei de Dependencia, “nun tean recibiendo nengún encontu por demorances inxustificaes y tecnicismos que nun son asumibles cuando falamos de les necesidaes básiques de les persones más débiles y desprotexíes”.

Zapico consideró incomprensible que “aumenten les persones demandantes y qu'amenorguen los beneficiarios, lo que namás demuestra qu'agora les polítiques sociales nun son una prioridá pal gobiernu asturianu”.

“Mano de fierro” d’IX
Nesti sen, UNA encamentó a IX como responsable del área de bienestar social del gobiernu asturianu, en manes de Noemi Martín, que “abandone la mano de fierro contra los más débiles”, criticando’l so votu “a favor de les midíes d'axustes más dures de tol estáu” y “el recorte de les prestaciones de la Llei de dependencia”.

“La Conseyería de Bienestar Social ta faciendo recayer el costu de la crisis sobre les persones que más precisen la protección pública, como ye'l casu de les muyeres y homes que pueden acoyese a la Llei de la dependencia”, sentenció Zapico.