UNA llamenta’l suspensu de Dependencia n’Asturies

Unidá Nacionalista Asturiana vien de llamentar “fondamente” el suspensu d’Asturies na aplicación de la Llei de Dependencia. L’Observatoriu de la Dependencia puntuóla con un 4 de 10, convirtiéndose nuna de les CC.AA onde peor s’aplica.

El voceru d’UNA, Fastuino Zapico, llamentó la situación y recordó que, como yá denunciara la so formación, “la crisis tán pagándola les polítiques sociales, a pesar de los desmentíos del gobiernu de PSOE ya IX”.

“Esti gobiernu puede aplicar mano de fierro contra los más necesitaos, cuando va con flores a ver a los que provocaron la crisis”, criticó Zapico. Amás, consideró que’l suspensu “dexa n’evidencia” a IX y a la conseyera de Bienestar Social, Noemí Martín: “el xiru social que según IX xustifica la so presencia nel gobiernu, ye un tapagüeyos que nun supera'l mínimu análisis superficial”, indicó Zapico.

Vixencia hasta mayu
Nesti sen, y en llínia de lo denunciao pol Bloque por Asturies nel debate sobre los presupuestos, Faustino Zapico apuntó a que les “supuestes meyores” que Martín anunció sobre la Llei “tienen un plazu de vixencia hasta les eleiciones de mayu de 2011, porque'l presupuestu presentáu estos díes nun garantiza la so aplicación más allá, porque ta basáu nunes previsiones irreales”.

“Esti gobiernu prefier suspender toles materies sociales que se precisen en cuenta de quitar la Fórmula 1 o'l fútbol profesional de la TPA,” acabó’l portavoz d’Unidá Nacionalista Asturiana.