Una iniciativa privada en Benia devolvería los eventos taurinos a Asturies

Un añu depués de que la falta de permisu poles condiciones de la finca frenara una ‘novillada’ en Mestas de Con, empresarios tornen a poner los sos güeyos nesta zona pa entamar un eventu taurín. Sería nel conceyu vecín d’Onís, en Benia, y coleutivos de la zona como la protectora Huellas del Sella miren pa movilizase otra vegada.

Una ‘Gran Fiesta Nacional de la Tauromaquia’. Asina ta anunciándose en redes sociales la iniciativa privada que se desendolcaría’l sábadu 20 d’agostu na finca Morán de la capital del conceyu.

Na mesma instalaríase una plaza portátil y entamaríense actividaes “en defensa de la ganadería y el mundu rural”. Desconozse si los organizadores yá cuenten colos permisos del Gobiernu y el Conceyu, pero xente de la zona apunta que yá hai movimientos de camiones nel llugar.

La noticia nun tardó en correr como la pólvora pel oriente, coles movilizaciones del añu pasáu pa frenar la ‘novillada’ de Mestas de Con entovía mui recientes. Los coleutivos que lideraron esta oposición a los eventos taurinos y al maltratu animal, que llegaron a recoyer más de 55.000 firmes en pocos díes, como la protectora Huellas del Sella, tán nestos momentos recopilando información sobre l’actividá prevista en Benia y tienen la intención de facer tolo posible pa torgar la so celebración.

Ensin Feria de Begoña

La decisión del Conceyu de Xixón de nun prorrogar el contratu de concesión de la plaza de toros con Circuitos Taurinos pa organizar la Feria de Begoña y la negativa a permitir eventos de cualquier tipu n’El Bibio por cuestiones de seguridá pol estáu de la infraestructura dexaba a Asturies esti añu llibre de corríes de toros per primer vegada depués de décades. L’apaición de la iniciativa privada de Benia podría devolver estos ‘festexos’ al país.

Na imaxe, Benia. Semeya obra de Luis Rogelio HM baxo llicencia CC BY-SA 2.0.