Una iniciativa de la UE podría aparar el proyectu d'incineradora en Serín

El Parlamentu Européu dio'l preste en primer llectura a una directiva cola que quier dar pasu a una política efectiva de mengua de residuos xeneraos nos estaos de la UE. Na directiva inxertóse un capítulu que fala específicamente de la incineración de basura y que pue suponer una torga insalvable pal proyectu d'incineradora que quier llevar alantre l'ente asturianu de xestión de residuos COGERSA en Serín. El "Conceyu contra la incineración" plataforma qu'atropa a toles organizaciones contraries a la incineradora, recibió con contentu la noticia.

La resolución fala de la necesidá de menguar el tantu por cientu de de residuos incineraos, calificando la incineración como "una de les principales fontes de contaminación ambiental". La incineradora prevista por COGERSA y que, dientro del Gobiernu asturianu, defende la FSA-PSOE como meyor midida pa enfrentase a la fin de vida útil del actual vertederu de Serín, esfronaríase dafechu contra esta normativa nueva. El vertederu recibe tolos díes una media de 700 camiones de tolos conceyos del centru d'Asturies que posen elli cerca de 650.000 tonelaes de basura, y cuéntase con que pal 2015 yá nun haya más sitiu pa siguir enterrando basura nesta instalación que s'inauguró nel añu 1985.

L'asociación Conceyu contra la Incineración congracióse pola midida que ta preparando la Eurocámara sobre la incineración y enfótase en que la Directiva Marcu de Residuos "pueda ser la fin del proyectu de la incineradora" y un sofitu llegal importante pa que se cumplan los oxetivos de recicláu del 50% de los residuos urbanos y del 70% de los industriales y de la construcción d'equí al 2020. Acordies colos datos del Ministeriu de Mediu Ambiente colos que trabaya'l Conceyu, Asturies tien una tasa media de recicláu del 9% y ye la comunidá autónoma que tien la peor calidá del aire, que dexenrea nuna alta mortalidá por enfermedaes respiratories. El Conceyu recordó que les incineradores de basures suponen "un riesgu, comprobáu y evidente, pa la salú de les personas que viven na so redolada".