'Una hestoria con munchu cuentu', teatru pa la reciella n'Avilés

Tragaluz representa esta obra dientro de la programación de 'La Reciella de la Factoría'.

'Una hestoria con muncu cuentu' trátase d'un espectáculu de marionetes onde'l personaxe principal, de nome Janco, va contando delles histories, poemes y rellatos qu'atopa nun desván, metiéndose dientro de todos ellos. Una prestosa función que forma parte d'esta iniciativa entamada pola Estaya de la Llingua d'Avilés en collaboración con 'Reciella. Families pol Asturianu' nel espaciu escénicu de la Factoría Cultural, siempre a les 19 hores y con entrada llibre, cola fin de que los neños y neñes avilesinos puedan disfrutar d'actividaes nel so idioma maternu.

Esta obra de marionetes ye la segunda de la programación d'esti añu, tres la representación de 'Runa' por Nun Tris. El restu d'actividaes previstes son les siguientes:

• 20 de mayu. 'Xelaos de cuentu', con Ana Morán: Nun son xelaos, son cuentos y nun se comen, tástiense. Hailos pequeños, más grandes, dulces, salaos refresquen, refresquen...
• 21 d'ochobre. 'Moliniellu', con Olga Cuervo: Cuentos que falen de moliniellos de vientu, de café y de música. Un espectáculu pa ver y escuchar.
• 25 de payares. 'Cuentos, cháchares y paroles', con Carlos Alba 'Cellero': Cuentos, canciones y una retafila histories, sobre too de tradición oral.
• 16 d'avientu. 'L´Anguleru: Suaños de Navidá', con Olga Cuervo: L'Anguleru ye un pescador asturianu que-yos lleva regalos a los neños y les neñes na nueche del 24 d'avientu.