Una esposición fotográfica amuesa en Cangues el procesu de construcción de la basílica de Cuadonga

Hasta’l día 29 ye posible visitar na Casa Cultura de Cangues d'Onís la esposición ‘Covadonga en la mirada fotográfica de Daniel Álvarez Fervienza’, encuadrada na programación Cuadonga 2022 de la Conseyería de Cultura, Política Llingüística y Turismu polos 1.300 años de la batalla. Ésta amuesa’l procesu de construcción de la basílica.

Doscientes placas fotográfiques captaes ente’l 1890 y 1910 componen el trabayu que permite ver la evolución del so llevantamientu y la tresformación radical que vivió tol entornu. El so autor ye ún de los primeros nomes de la historia de la fotografía asturiana que se convirtió en profesional depués d’exercer como maestru en Llanes y el so llegáu forma parte de la coleición privada d’Antonio Diego, comisariu de la esposición, que fixo la escoyeta y cedió’l material pa la so exhibición.

Álvarez Fervienza tuvo’l privilexu de ser contratáu pa documentar tol procesu de construcción de la basílica y dalgunes de les sos imáxenes convirtiéronse depués en postales. ‘Covadonga en la mirada fotográfica de Daniel Álvarez Fervienza’ ye una de les seis esposiciones que la conseyería entama dientro de la programación de Cuadonga 2022 y va poder visitase hasta’l día 29 de baldre a 10 quilómetros de la basílica, en Cangues d'Onís, de llunes a vienres de 10 a 13 y de 16 a 20 hores.

Semeya obra d'Álvarez Fervienza.