Una esposición repasa la trayeutoria de los cantantes principales de canción asturiana de Samartín

‘Hai una lletra cantada...’ ye la esposición que se pue visitar na Casona del Bravial de Blimea hasta’l 25 d’ochobre. Esta muestra repasa la trayeutora de los cantantes principales de canción asturiana de Samartín del Rei Aurelio.

Silvino Antuña, Graciano Fernández y Gerardo Orviz, o otros artistes más mozos como Emi Fanjul y Andrés Collado, son dalgunos de los cantantes que protagonicen esta muestra entamada pola Oficina de Normalización Llingüística de Samartín del Rei Aurelio. Amás de conocer la trayeutoria d’estos artistes, el visitante tamién va poder sentir la so voz interpretando cantares como ‘Hai una llinia trazada’, ‘Pasé’l puertu Payares’ o ‘Viva la xente minero’, ente otros munchos.

Otru atractivu que tien la esposición ye la posibilidá de ver, gracies a la collaboración de l’Asociación de la Canción y el Folclore Valle del Nalón, dellos instrumentos musicales tradicionales fabricados de manera artesanal pol so presidente José Luis Alonso Rozada, ente los que s’inclúin gaites, bandurries, rabeles, castañueles o carraques. La muestra, que s’inauguró ayeri, va tar abierta’l públicu hasta’l 25 d’ochobre n’horariu de 9 a 13 hores, de llunes a vienres.