Una esposición presenta en Xixón 135 semeyes sobre países en situación de conflictu

El Centru de Cultura Antiguu Institutu acueye dende esti miércoles una esposición que recueye 135 semeyes de países en situación de conflictu. Ésta tien el nome de 'FotoPres La Caixa 09' y va permanecer en Xixón hasta’l 24 d’abril.
 
La represión en países árabes o africanos, los rostros desfiguraos de les muyeres en Paquistán a causa de la violencia de xéneru y los cambios sociales nes ciudaes son dalgunes de les temátiques que traten les 135 semeyes que formen parte del ‘FotoPres La Caixa 09’, un certame fotográficu documental y bienal que na so decimonovena edición tuvo de nexu común “la reflexón sobre les condiciones de vida de dellos países con situaciones de conflictu”. Les escoyíes pa esta esposición son los meyores trabayos de los 316 presentaos a concursu.
 
Asina, xixoneses y visitantes van poder ver ‘Violencia de xéneru en Paquistán’, d’Emilio Morenatti, semeya ganadora del primer premiu y pola que l'autor se llevó una recompensa de 19.000 euros; ‘Violencia post-eleutoral en Kenia’, de Walter Astrada, segunda clasificada ; o ‘Líbano, ente mar y fueu’, de Alfonso Moral, tercer trabayu escoyíu pol xuráu del certame. La muestra también presenta los proyeutos documentales de los seis fotógrafos que se llevaron como premiu una beca: Lourdes R. Basolí, Fosi Vegue, Marta Ramoneda, Aleix Plademunt, Mikel Aristregi y José Luis Expósito. Amás, los visitantes de ‘FotoPres La Caixa 09’ van poder disfrutar d’un documental entituláu 'Al otru lláu de la cámara', onde se muestren les nueve miraes sobre la fotografía documental de los premiaos y becaos.