UNA defende otru sindicalismu y movilízase cola CSI el 29-S

UNA va participar na manifestación convocada por CSI en Xixón el 29-S. Asina lo manifestó Faustino Zapico, portavoz de la formación, que ve necesariu un sindicalismu pa trabayadores y non pa “los porgüeyos de los sindicatos mayoritarios”.

Dende Unidá Nacionalista Asturiana consideraron que la crisis actual esixe “superar l'actual modelu de concertación social que fai recayer los costos nos trabayadores” y terminar con un sindicalismu caracterizáu poles “estructures burocrátiques esistentes na actualidá”, pa buscar un modelu “más acordies al día a día de la clas trabayadora y que garantice la so independencia frente a los distintos gobiernos”

La discrepancia pa con CC.OO y UXT ye lo que va facer a UNA participar na manifestación convocada pola Corriente Sindical d’Izquierda na Plaza L’Humedal de Xixón a les 13 hores. Faustino Zapico criticó tamién a los sindicatos mayoritarios por convocar “una fuelga xeneral una vegada aprobada la reforma llaboral, pa dañar lo mínimo posible a un gobiernu entornáu en caltener los sos privilexos”.

“Nun podemos quedar paraos cuando vemos valtar la economía asturiana por culpa d'unes polítiques suicides del gobiernu Zapatero”, opinó Zapico sobre unes midíes que tachó de responder “a una política pura y dura de dereches onde los recortes sufriéronlos que menos tienen”, polo que llamó a la movilización nel 29 de setiembre.
 
Crítiques al gobiernu asturianu
UNA tamién criticó al llabor del gobiernu asturianu. Según Zapico, PSOE y IX “renunciaron a plantegar una respuesta asturiana a la crisis” que, según el nacionalista, se traduz en exisir “una posición firme frente a los recortes de fondos del gobiernu central” y “escaecese de los gastos escomanaos improductibles ya invertir na capacidá d'anovación y la iniciativa de les asturianes y asturianos”.