UNA decide nun acudir a les eleiciones xenerales del 20-P

La militancia d’Unidá Nacionalista Asturiana (UNA) decidió nun conceyu abiertu nun acudir a les xenerales del 20-P pa siguir trabayando nel proyeutu de xuntanza entamáu xunto col Bloque. El sociu d’UNA va decidir esti xueves la so postura.
 
A lo llargo del día, la direición d’UNA va asoleyar un comunicáu nel que va esplicar les razones que llevó a la organización el tomar esa decisión. Una situación que pue sorprender a los sos votantes pero que nun frena la intención de la formación nacionalista de siguir trabayando nel procesu de xuntanza entamáu xunto col Bloque col que les dos formaciones busquen abrise a otros sectores cola fin d’axuntar a tol asturianismu de cara a les nacionales y municipales del 2015.
 
Esta tarde, a les 20 hores, el Bloque por Asturies va celebrar una xunta nacional na so sede d’Uviéu pa estudiar la situación y tomar una decisión sobre la partipación o non del partíu nes xenerales del 20 de payares. Sin nun hai sorpreses, la  postura del Bloque va ser la de nun acudir en solitariu a les eleiciones y siguir afondando nel proyeutu conxuntu cola UNA anunciáu’l pasáu 8 de setiembre.