Una crónica particular de la fiesta de Rodiezmo

Anque se faiga en tierra de Llión, la romería de Rodiezmo, que tolos años organiza'l Sindicatu de los Obreros Mineros d'Asturies (SOMA) ye la gran romería del socialismu sindical y políticu asturianu. Anque munchos dicen que la fuerza del SOMA anda de capa cayida acordies cola propia crisis del sector, lo cierto ye que la cita máxica de Rodiezmo entovía axunta na campa llionesa a más de venti mil persones tolos años pa esfrutar de la folixa y los discursos políticos, ente los que nunca nun falta'l de José Ángel Fernández Villa, líder del sindicatu dende la transición y diputáu na Xunta Xeneral del Principáu. Esti añu tuvieron xunta elli l'antiguu vicepresidente del gobiernu, Alfonso Guerra, el presidente del Principáu Vicente Alvarez Areces y el candidatu socialista a la presidencia del Gobiernu d'España, José Luis Zapatero, que falaron nel mesmu escenariu dende'l que'l grupu Azucar Moreno echaría'l piesllu musical a esta fiesta política.Ello ye que gracies al llabor d'un voluntariu simpatizante socialista, tenemos agora na rede un testimuñu interactivu de lo que foi Rodiezmo 2002. Nella podemos alcontrar resúmenes de les intervenciones de los protagonistes políticos y hasta baxar archivos en formatu mp3 de los sos discursos. Si los primeros tan fechos dende la inevitable simpatía pa colos ponentes, como cuando diz que "Ese espíritu batallador, de lucha y esfuerzo, que no se rinde ante la presión externa, es lo que en último extremo cautiva en Areces" nos segundos que podemos alcontrar braeres maravíes de la retórica, como'l momentu estelar cuando Villa fala ná menos que del fichaxe de Ronaldo pol Real Madrid. Pasái y vei.…