UNA critica'l “calter homófobu” del Partíu Popular

UNA criticó les declaraciones de Mariano Rajoy contra’l colectivu homosexual. Pa los nacionalistes les palabres de Rajoy amuesen el “calter homófobu” del PP, partíu al que comparen colos ultraconservadores del Tea Party.

El portavoz d’Unidá Nacionalista Asturiana, Faustino Zapico, criticó les últimes declaraciones del cabezaleru del PP n’España, Mariano Rajoy, en rellación al colectivu homosexual. Zapico denuncia que los populares tovía caltengan na so axenda política “la eliminación de los derechos del colectivu homosexual”.

“La cruzada mesiánica del PP contra los homosexuales ta convirtiéndose nuna de les señes d'identidá de la derecha española, que nun ye capaz d'asumir que tolos ciudadanos tenemos los mesmos drechos independientemente de la nuesa condición sexual", criticó’l voceru asturianista.

Zapico tamién denunció que pal PP ye “inasumible que’l estáu trate igual a una pareya heterosexual católica y tradicional, qu'otra con distintos valores o qu'apueste por modelos de familia alternativos”, y comparó a la formación de Rajoy col sector ultraconservador del Partíu Republicanu estaunidense, el Tea Party.

Cola igualdá
Per otru llau, Faustino Zapico tamién refugó que Rajoy arremeta contra’l Ministeriu d’Igualdá y que considere una “pérdida de tiempu” lluchar pola igualdá de xéneru en plena crisis económica.

"Pa  Mariano Rajoy paez que nun ye una perda de tiempu siguir lluchando escontra los derechos del colectivu homosexual, a pesar que la crisis sigue más viva que nunca" sentenció Faustino Zapico.