UNA critica’l resultáu del DOP y llama a construir l’alternativa

Unidá Nacionalista Asturiana criticó’l resultáu del Debate d’Orientación Política qu’acabó esti llunes na Xunta Xeneral. “Lo poco que dexó claro ye la necesidá que tien la sociedá asturiana de finar con proyectos fracasaos”, diz UNA.

El portavoz d’Unidá Nacionalista Asturiana, Faustino Zapico, amosó’l so rechazu al resultáu del Debate d’Orientación Política. Calificó de “suplerfuu” el calter de les propuestes de resolución aprobaes y señaló que “nun valen pa salir de la crisis actual nin-yos dan respuesta a les necesidades que dende hai abondos años tien Asturies”.

Zapico tamién criticó’l discursu d’Areces sobre’l qu’opinó que taba “enllenu de llugares comunes y repetíos, autocomplaciente y inútil”. “Areces nun dio nin una sola idea p'acabar colos problemes más allá de siguir pidiendo subvenciones ensin saber pa qué nin qué facer con elles, como demuestra la situación actual de la minería”, denunció.

“Siguimos siendo la comunidá autónoma con menos porcentaxe de trabayadores sobre la población total, na que más mocedá emigra y más tarde se pon a puebla, la única que va perder población nos próximos diez años y la que más depende de los recursos del gobiernu central y européu”, sorrayó’l nacionalista preocupándose pol futuru del país.

“Espectáculu patéticu”
El portavoz d’UNA tamién dixo que’l PP y IX dieron un “patéticu espectáculu con un repartu de papeles ente una supuesta oposición de dereches” y “una supuesta fuercia d’izquierda que valida’l gobiernu d’Areces, cola so participación nel mesmu”.

Sobre les diez propuestes de resolución aprobaes, Zapico criticó que “nin entren na base de los problemes que tamos sufriendo, nin suponen un toque pal gobiernu Zapatero polos recortes que ta imponiendo a Asturies, ún de los más duros de tol estáu”.

Alternativa de futuru
A la par, Faustino Zapico valoró la intervención del portavoz del Grupu Mestu, Roberto Colunga y, en rellación a descalificación d’Areces opinó que “les llamaes minoríes son más peligroses pal réxime de la FSA que'l restu de grupos parlamentarios”.

Nesta llínia sorrayó la necesidá de construyir una alternativa política “que dexe de ser minoritaria, con un discursu asturianu, social y ecoloxista” y señaló que “el Bloque por Asturies tien una gran responsabilidá pa ser una parte de l'articulación d'esa solución y esa respuesta que parte de la sociedá asturiana quier”.

“Fai falta responsabilidá, xenerosidá y altura de mires de tolos posibles actores d'esi procesu, faciendo por nun cayer n'errores que yá habríen tar superaos pola esperiencia y la madurez política, pa que nel Debate de 2011 esa alternativa unitaria, plural y abierta tea presente na Xunta Xeneral”, concluyó Zapico.