UNA cree necesario reflexonar y facer autocrítica “pa consolidar un proyeutu políticu asturianu”

“Ye’l momentu de la reflexón, análisis y autocrítica pa consolidar un proyeutu políticu asturianu”. Ésta ye la opinión d’UNA tres les eleiciones, formación que quier “ampliar los espacios de suma, de diálogos y d’alcuerdu”.
 
La executiva d’Unidá Nacionalista Asturiana (UNA), que nestes nacionales y llocales presentóse xunto col Bloque por Asturies, señaló que “el resultáu de les eleiciones tuvo perbaxo de les espectatives y posibilidaes de la coalición”. Sicasí, “UNA agradez fondamente la confianza de los casi 7.000 asturianos y asturianes que dieron el so apoyu a les distintes candidatures municipales o autonómiques de la coalición Bloque por Asturies-UNA a les eleiciones del 22 de mayu y a los cientos de persones que trabayaron y nos sofitaron na campaña d’una o otra manera”, señala la so vocera, Yolanda Huergo.
 
Tres estes eleiciones toca mirar al futuru y dende la formación nacionalista señalen que la “organización ta inda más comprometida que’l día 22 pa consolidar y ampliar los espacios de suma, de diálogu y d’alcuerdos que tán abiertos nesti momentu, y pa siguir construyendo de forma afayadiza'l proyeutu asturianu, d’izquierda y ecoloxista y non subsidiariu, qu’Asturies precisa y que nos demanda una parte de la sociedá”. Pa entamar a trabayar nello, UNA convocó una Xunta Xeneral pa esta selmana, órganu máximu d’organización ente congresos de la formación nacionalista.
 
En relación col panorama políticu qu'escoyeron los asturianos y asturianes el 22 de mayu, Huergo señaló que “dende la executiva d'UNA constatamos que n'Asturies había una demanda importante de cambiu polos años de gobiernu de redes clientelares y la xestión nefasta del  bipartidismu PSOE-IU y PP que traxeron la subordinación d'Asturies, la so invisibilidá y l’acentuación de la crisis. Esi descontentu canalizólu mayoritariamente la opción casquista, convirtiéndose na receptora d'un votu protesta énte la situación política asturiana, xenerando una falsa sensación de cambiu”. Por último, la vocera de la formación nacionalista señaló que la executiva d’UNA felicita “a los conceyales de Carreño, Nava y Ḷḷena y llaméntase que n’otros conceyos nos que se sacaren mui bonos resultaos nun se pudiere algamar la representación, anque se dexa una bona base de trabayu pa los próximos años”.