UNA celebra la sentencia contra’l proyectu de gaseoductu

El voceru de medioambiente d’UNA, Tino Fernández, aplaudió esti xueves la sentencia de l'Audiencia Nacional qu'obliga a realizar la evaluación d'impactu ambiental pal proyectu de gaseoductu d'El Musel a Llanera.

Tamién felicitó a l'Agrupación de Vecinos y Amigos de Llanes (Avall) pola sentencia que llograron nesti asuntu.
  
Tino Fernández, nun comunicáu, recuerda qu’Unidá Nacionalista Asturiana tamién reclamara la realización de la evaluación d'impactu ambiental, al traviés d'un escritu al Ministeriu de Mediu Ambiente con fecha del 4 de setiembre del 2008.
  
UNA felicitó a Avall "pol éxitu de la so actuación nel tema del gaseoductu El Musel-Llanera y la sentencia favorable que llograron" y considera que "munches de les actuaciones que tán llevando a cabu contra la política enerxética en Asturies, dexaren ver claramente lo que venimos denunciando dende hai tiempu, que los proyectos enerxéticos tán desarrollándose sin tener en cuenta les nueses necesidaes reales y por tanto incumpliendo flagrantemente la normativa estatal y europea nesta materia", señala Tino Fernández.
  
Dende UNA pregúntense "hasta cuándo les Alministraciones Públiques van negar a los ciudadanos los sos derechos en fase alministrativa, cuando son conscientes que los tribunales van danos la razón" pero tamién acusa a les alministraciones de que "saben que pol costu de les actuaciones xudiciales, non siempre puede acudise a esta vía pa parar los escesos que se comenten en materia medioambiental", lo que califica como una actuación miserable per parte de los responsables políticos, qu'utilicen una clara posición d'abusu de poder pa llendar l'algame de la protección medioambiental".
  
A lo último, el voceru de medioambiente acaba solicitando al gobiernu central “qu'encare'l problema real de la política enerxética del estáu, que Madrid consume más que naide pero niégase a producir enerxía pol baxu valor añadíu y rentabilidá d'esta producción, como vuelven demostrar los informes de Rede eléctrica", y al gobiernu asturianu que "dexe de preocupase pola posición que-yos va tocar nes llistes electorales, lo qu'esixe nun molestar al gobiernu Zapatero, y faigan cumplir la política enerxética estatal aprobada, que torgaría realizar esta apuesta pol monocultivu enerxéticu n'Asturies, pa satisfaer les necesidaes d'otros".