Una carrera solidaria va percorrer el Monte Deva pa reforestar la zona

Esti domingu llega a Xixón la iniciativa ‘Regala un bosque’. Ésta consiste nuna ruta senderista y una carrera de montaña per zones que sufrieron un incendiu cola fin de recaudar perres pa reforestar la zona afeutada.
 
‘Regala un bosque’ ye un proyeutu solidariu que tien como oxetivu “que los participantes ‘regalen’ a la so comunidá llocal la reforestación de la so zona afarada pol fueu”, señalen nuna nota los sos organizadores. Pa ello, éstos entreguen tola recaudación procendente de les inscripciones a una ONG o entidá llocal que va encargase de recuperar la zona castigada pol incendio. Tres una esperiencia piloto entamada l’añu pasáu en Granada y Sant Llorenç Savall, nel 2011 amplióse’l proyeutu a otros puntos del Estáu ente los que ta’l Monte Deva, viesca atacada pol fueu nel añu 2008.
 
El percorríu de la carrera xixonesa, como ye vezu nesta competición solidaria, va trescurrir peles zones que quemaron cola intención de que les persones que participen sían conscientes del dañu que faen estos incendios forestales a la vexetación. La organización de ‘Regala un bosque’ ufre dos rutes distintes según el nivel de los participantes: una destinada a senderistes de 6,08 quilómetros y otra de 10, pa corredores. El preciu de inscripción ye de 8 euros, na web del proyeutu, o de 9,21 na zona de salida nel Centru d’Interpretación de la Naturaleza del Monte Deva dos hores enantes del aniciu de les dos competiciones solidaries, previstes pa les 11 hores. La organización pon al serviciu de los participantes un serviciu de guardarropes y mochiles.
 
El proyeutu ‘Regala un bosque’ ye iniciativa de la Fundación Deporte Mozu del Conseyu Superior de Deportes (CSD) y la Asociación Deportiva AEMAT. Amás, collabora nél la Fundación Biodiversidá, adscritu al Ministeriu de Mediu Ambiente y Medio Rural y Marín, comprometida con la preservación del patrimoniu natural y la biodiversidad. Ente los munchos deportistes qu’apadrinen ‘Regala un bosque’ ta Luis Enrique, ex futbolista del Sporting y entrenador nuevu de la Roma.