Una carrera popular percuerre Euskal Herria en defensa del euskera

Korrika ye’l nome d’esta carrera en defensa del euskera que nació nel 1980 y que lleva diecisiete ediciones, si contamos l’actual. Miles de persones de toles edaes y condición participen nesta iniciativa qu’esti llunes pasa per Amurrio.
 
La salida de la decimosétima Korrika celebróse’l xueves en Trebiñu y tien previsto finar el domingu en Donostia a les 13 hores con una serie de celebraciones nes que de xuru va haber presencia asturiana, yá que nesa xornada miles d’asturianos van tar na capital gipuzkoana acompañando al Sporting nel so partíu contra la Real Sociedad. Once etapes que convierten los pueblos y ciudaes per onde pasen nuna folixa con l’euskera como protagonista. Güei, la Korrika ta pasando pol sur d’Araba y el norte de Burgos y en pueblos como Amurrio tán previstes cuentacuentos, chocolataes, espectáculos de maxa y proyeiciones de curtios y semeyes.
 
AEK, Coordinadora d’Euskaldunización y Alfabetización dedicada al públicu adultu, ye’l coleutivu qu’organiza esta carrera popular que se desarrolla per turnos. Cada participantes percuerre un quilómetru con un testigu que tien un mensaxe dientro y que nun se da a conocer hasta la llegada, una distancia que’l portador suel facer acompañáu d’otres persones que quieren participar na iniciativa. Nesta edición, l’itinerariu de la Korrika tien una distancia de más de 2.000 quilómetros, lo que suponen otros tantos relevos.
 
La Korrika ye una iniciativa perguapa que se celebra cada dos años y que tien como oxetivu impulsar la concienciación a favor del euskera y recaudar fondos pa poder financiar les escueles d’AEK onde los vascos y les vasques adultos pueden afondar nel so conocimientu del idioma del llugar.