Una camiseta pa defender la toponimia tradicional de Cuideiru

|
Camiseta El Teixu toponimia de Cuideiru

El Teixu va presentala con una charra de Fernando Álvarez-Balbuena sobre la historia de los nomes de llugar del conceyu.

Dask Vega encargóse del diseñu d'una camiseta que pretende ser una reivindicación de la toponimia tradicional de Cuideiru tres los ataques que se vinieron faciendo a la so recuperación dende dellos sectores que tuvieron l'altavoz d'un diariu asturianu que nacen "pol desconecimientu de las formas populares ou inclusivamente por intereses políticos espurios". La prenda amuesa la silueta del conceyu col lema '¿Sos de Cuideiru?', que se repite pela parte d'atrás, nesta ocasión col logu d'El Teixu Rede pal Estudiu y Defensa de la Llingua Asturllionesa y dellos de los nomes autóctonos de los llugares pixuetos.

Pa presentar en sociedá esta creación entámase una conferencia n'Oubiñana de nome 'De Cuideiru a Vaḷḷouta: Historia, situación ya recuperación de los topónimos autóctonos del conceyu de Cuideiru' que va poner el llingüista Fernando Álvarez-Balbuena. "La xente conoz bien los nomes que dienon tola vida en casa a los pueblos de Cuideiru ¿pero sabemos d’áu vienen esos topónimos? ¿Qué significa Vaḷḷouta, Reseḷḷinas, Salamir ou Cuideiru…? A esas preguntas vei tentar responder Álvarez-Balbuena na charla" prevista pa mañana a les 19.30 hores na Escuela de Riegurriba.

Cuideiru ye ún de los 18 conceyos qu'entá nun oficializó los topónimos tradicionales, llista na que tamién tán Uviéu, Cabrales, Llanera, Castropol, Cuaña, Les Regueres, Onís, Somiedu, Ayande, Caravia, Ibias, El Valle Baḥu de Peñamellera, Salas, Navia, Pravia, Muros y Eilao. El borrador del espediente toponímicu pixuetu yá ta ellaboráu y queda qu'ésti reciba'l preste del Plenu pa siguir col procesu.

Contador Estadistiques