Una baxada na media d'edá de los autores carauteriza'l númberu 12 de la revista lliteraria moza Formientu

Más moza y de más calidá. El númberu 12 de la revista lliteraria d’escritores mozos Formientu yá ye una realidá. Cuanta con testos en llingua asturiana de quince autores menores de 30 años, amás d’otros atractivos.

La nómina d’escritores qu’espublicen nesti númberu de Formientu ta compuesta por Alberto Cla, Andrés Astur Treceño, Laura García Calvo, Cristina Menéndez Martín, Fonsu Suárez, David Carrasco Díaz, Naomi Suárez González, Ismael Carmona García, Nayar Crespo Sánchez, Jaime Martínez Menéndez, Pablo M. Testa, Alba Llaneza Pulido, María García Díaz, Blanca Fernández Quintana y Xurde Álvarez Antón. El xoven fotográfu y cineasta Pablo Casanueva ilustra esti exemplar nel que se dedica la seición ‘Cuando... yera autor mozu’ a Pachín de Melás, con un testu de cuando’l xixonés tenía 22 años.

El sábadu celebróse nel Espaciu Cultural La Manzorga la presentación de la revista, actu que tuvo dirixíu pol so direutor, Inaciu Galán, que recordó la trayeutoria d’una espublización que ta “a piques de cumplir ocho años” y que nació col oxetu de dar espaciu a los escritores más mozos. Los autores García Calvo, Cal, Llaneza y García Díaz, xunto con Galán, recitaron dellos poemes d’esti númberu acompañaos pola música de viola de Suárez González. La revista yá ta la venta a un preciu de 6 euros en La Manzorga y na llibrería uviedina Ojanguren, y pronto n’otros establecimientos del país.