Una avería llétrica nel HUCA obliga a suspender delles operaciones

L’Hospital Universitariu Central d’Asturies sufrió un apagón a les 6.30 hores qu’obligó a suspender delles intervenciones quirúrxiques. L’avería afeutó a les llinies d’alta tensión soterrañes del centru y nun s’iguó hasta 13 hores depués.
 
A pesar de que los sistemes d’emerxencia furrularon de manera correuta, los quirófanos del hospital xeneral y maternidá comenzaron la xornada con retrasu, mentes que na residencia suspendiéronse les intervenciones de Ciruxía Xeneral, Neurociruxía, Ciruxía Plástica, Uroloxía, Traumatoloxía y Otorrino, según informó l’HUCA. La direición del centu sanitariu trabayó na reprogramación de toles operaciones en collaboración colos xefes de serviciu col propósitu de que’l fallu llétricu afeutara nel menor grau posible al funcionamientu del hospital.
 
Los pacientes ingresaos recibieron la so medicación con normalidá y tamién se sirvieron los almuerzos y les xintes ensin problema. Los servicios de mantenimientu del HUCA trabayaron tol día na reparación del sistema llétricu, qu’algamaron sobre les 19.30 hores, 13 hores depués de l’avería.