Una actuación nel castru de Cuaña permite desenterrar una cabaña

El Plan de Castros tien en marcha una campaña nel de Cuaña que permitió desenterrar dafechu una cabaña, edificiu identificáu como 84, que se descubriera nel 1991 y de la que nun se tenía información sobre’l so rexistru arqueolóxicu. En setiembre tamién van entamase trabayos d’investigación y conservación nel de Mouguías.

Les actuaciones nos dos castros tán enfocaos “a recuperar una visión llimpia de los restos y a ellaborar un rexistru arqueolóxicu, agora inesistente, que permita facer una llectura solvente de los dos xacimientos”, apunten dende la Conseyería de Cultura, Política Llingüística y Turismu. El direutor xeneral de Cultura, Pablo Léon, visitó esta mañana los dos llugares en compañía de los téunicos que coordinen les escavaciones.

Nel casu concretu del de Cuaña, asitiáu en Villacondide, nel que yá s’intervieno l’añu pasáu, “lo que ta saliendo a la lluz ye una antigua cabaña, que yá fora escavada nos años 90, pero que nun se siguió investigando”, apuntó. La investigación “permitirá mui temprano que s’amplíe l’ámbitu de visita pública del castru. Tamos trabayando pa que nun futuru non mui llonxanu les zones visitables d’esti castru sían mayores y eso permita una comprensión meyor a los visitantes de lo que yera’l castru, de cómo yera la so estructura, les sos defenses...”, añadió.

Los datos algamaos nesta campaña n'El Castriyón, xunto con una meyor definición topográfica del sistema defensivu, aportarán información nueva a la base documental del xacimientu y favorecerán la integración de les estructures identificaes na propuesta de musealización del conxuntu. Amás fíxose la llimpieza y la documentación fotográfica y planimétrica de la superficie del castru, escavada manualmente pa desenterrar la construcción y la so redolada.

Tou’l procesu documentóse de manera exhaustiva y entamáronse muestreos pa posteriores estudios d’orde paleoambiental, análisis radiométricos de delles muestres, y el sigláu y estudiu de los materiales arqueolóxicos. Los téunicos valoraron tamién les patoloxíes y los problemas de conservación de les estructures deteutaes nel castru.

Otres dos en Mouguías

N’otru llugar del conceyu, n'Os Curutellos, van arrancar los trabayos d’investigación y conservación del castru de Mouguías en setiembre. L’oxetivu ye desenterrar otres dos cabañes, identificaes como les construcción 8 y 9, y la regularización del área escaváu nel so entornu.

Tamién dientro del Plan de Castros tán previstes intervenciones nel de San Ḷḷuis (Allande), onde hai un proyeutu de recuperación de parte de la muria esterior; nel de Doña Palla (Pravia); y en Degaña.