Un trabayu de Damián Barreiro lleva’l VI Premiu Fierro Botas

‘L’espeyu onde miranos: televisiones de proximidá n’europa Occidental y procesos de recuperación identitaria’ resultó escoyíu por unanimidá como’l trabayu merecedor del VI Premiu Fierro Botas. El so autor ye Damián Barreiro Maceiras.

El periodista nacíu n’A Estrada nel 1984 anque criáu n’Avilés, ex redautor d’Asturies.com y Les Noticies, y autor del blogue ‘Cultura basura’, fai nesti ensayu un análisis de les televisiones de proximidá mesmo n’Europa como nel Estáu español, da una visión personal y nacional d’Asturies como país con identidá propia, y trata los xéneros televisivos y l’idioma como xerme d’una industria cultural. Esti llabor, xunto colo interesante del tema y la novedá del conteníu, foi lo que terminó de convencer al xuráu del gallardón, que tuvo formáu por Carlos Rubiera, conceyal d’Educación, Cultura, Mocedá y Fiestes de Xixón –que fixo de presidente–; Humberto Gonzali, escritor y xestor cultural; Jose Ramón Iglesias Cueva, profesor y representante de l'Academia de la Llingua Asturiana; Jaime González Fierro-Botas, filólogu y representante de la familia Fierro Botas; Inaciu Hevia Llavona, ganador de la edición anterior col trabayu ‘La botella de Xixón. Oríxenes y desendolcu hestóricu de la botella de sidra d’Asturies’; y María Xosé Rodríguez López, responsable de la Oficina de Normalización Llingüística Xixón –qu’actuó como secretaria–.

El Premiu d’Ensayu y Trabayos d’Investigación Fierro Botas, que concede l'Ayuntamientu de Xixón al traviés de la Conceyalía d'Educación, Cultura, Mocedá y Fiestes, tien como oxetivu recordar la figura del xesuita Federico González-Fierro Botas, espertu en llingua asturiana que finó n’accidente de tráficu en Rusia nel 2002, y reconocer el llabor de los investigadores asturianos na llingua del país. El gallardón tien como recompensa 3.000 euros y la espublización del ensayu.