Un total de 23 mozos y moces de 19 centros asturianos participaron na Escuela d’Asturianía

Per trés selmanes tuvieron n’Asturies formándose en cultura tradicional asturiana pa depués enseñala nos sos centros asturianos d'orixe. Foi na Escuela d’Asturianía, que na so cuarta promoción participaron un total de 23 mozos de 19 coleutivos d’emigrantes.

D’ellos, la mayoría proceden del otru llau del charcu, en concreto doce d’Arxentina (Tucumán, Rosario, Comodoro-Rivadavia, Mar del Plata, Mendoza, Buenos Aires, Santa Fe, Paraná, La Plata), trés de Xile (San Fernando, Valparaíso y Santiago), ún de México (Distritu Federal) y otru de Brasil (São Paulo). Mentes, cinco formen parte de centros asturianos del Estáu (Gasteiz, Logroño, Valladolid y Barcelona) y ún de Bruxeles. Doce son mozos y  once, moces, qu’agora llevarán los sos conocimientos alquiríos a los sos llugares de residencia pa treslladalos a fíos y nietos d’emigrantes asturianos.

La Escuela d’Asturianía entamóse nel añu 2001 “col propósitu d’estender el conocimientu sobre el so llugar d’orixe, historia, folclor y llingua a los descendientes de emigrantes” y reforciar asina les rellaciones “que xunen a les cases y centros d’Asturies repartíos pel mundu”, apunten dende’l Gobiernu. Dende entós, formáronse cuatro promociones y celebráronse 68 cursos d’estensión, cinco nel Estáu y trés n’América, nos que participaron más de 500 mozos. Esti llabor permitió la creación de dellos grupos de baille y de gaites, espardiendo asina al mesmu tiempu la cultura asturiana pel mundu.