Un total de 18 partíos van participar nes eleiciones del 22 de mayu, la cifra más alta en democracia

La Xunta Eleutoral rexistró un total de 18 candidatures pa les eleiciones a la Xunta Xeneral del 22 de mayu. Esta cifra supón un récord en democracia al superar les 12 formaciones que participaron nel 1999 y nel 2003.
 
A la medianueche del llunes al martes pesllóse’l plazu pa la presentación de candidatures pa la Xunta Xeneral, que mañana van ser publicaes nel Boletín Oficial del Principáu d’Asturies (BOPA). Depués la Xunta Eleutoral va comenzar a revisar toles llistes presentaes pa detectar cualisquier error o irregularidá que los partíos afectaos tendríen dos díes pa solucionar. El día 25 van dase a conocer les candidatures definitives, que van publicase nel BOPA al día siguiente.
 
Ente les 17 llistes que se presenten a les eleiciones hai tres de calter asturianista: Bloque por Asturies-Unidá Nacionalista Asturiana (BA-UNA), Unión URAS-PAS y Conceyu Abiertu. Completen la llista’l PSOE; Partido Popular; Izquierda Xunida-Los Verdes d’Asturies; Partido Democrático y Constitucional; Los Verdes-Grupo Verde; Partido Antitaurino contra el Maltrato Animal (PACMA); Partido Comunista de los Pueblos de España (PCPE); Frente de la Izquierda; Foro Asturias Ciudadano (FAC); Agrupación de Independientes del Principado de Asturias (Ideas); Alternativa Liberal Social; Unión, Progreso y Democracia (UpyD); Frente Nacional-MSR; Democracia Nacional; y Unificación Comunista de España.