Un testigu de güelos a fíos

La carrera de families pol asturianu ‘Entaína’ axuntó a cerca de doscientes persones esti domingu nel marcu del IV Día de la Reciella. Mayores y pequeños percorrieron un circuitu pel Muséu del Pueblu d’Asturies nun ambiente non competitivu pa simbolizar el pasu del testigu de la tresmisión xeneracional del asturianu.

El pistoletazu, o meyor dicho,  la carraca de salida diose pasaes les 11 hores, con casi doscientos inscritos, ente los que taben el futbolista del Sporting Nacho Cases, que sofitó la iniciativa anque nun corrió poles molesties que-y impidieron tar el día anterior en Riazor, la diputada nel Congresu por Podemos Asturies, Sofía Castañón, l’escritor y académico Vicente García Oliva o la responsable de la Oficina de Normalización Llingüística de Xixón, María Xosé Rodríguez . La reciella, entusiasmada cola iniciativa, ocupó los primero llugares, mentes que los adultos, dalgunos acompañaos polos más críos, tomaron la carrera con más calma.

Mientres el percorríu, de 800 metros, fíxose’l pase del testigu que simbolizaba la tresmisión xeneracional del idioma por parte de la familia Prendes, de Carreño: güelu, madre y fíu. El personaxe ‘SuperLlingua’ encargóse d’animar la carrera xunto a David Varela col micrófonu. Pelos altavoces nun aparó de sonar el cantar ‘Entaína’, compuestu pa la ocasión por Skama la Rede con lletra del miembru de ‘Reciella. Families pol Asturianu’ David Guardado.

Tres la llegada a meta, entamóse un sortéu de regalos ente tolos participantes. Dende Reciella consideraron un ésitu d’organización esta carrera, al ser la primer vez que se celebra, cola intención de repetir la esperiencia n’años próximos dada la importante participación.