Un sellu cola frase “Asturias libre” llevantó polémica na prensa española nel 1906

L’historiador Pablo R. Alonso atopó nun fondu documental un sellu cola frase “Asturias libre” xunto con un comentariu manuscritu qu’esplicaba que circulara clandestinamente per Asturies hacia 1902 “cuando la cuestión catalana comenzó a agudizarse”. Nel 1906 ocuparía páxines na prensa española.

El xixonés cuenta nun artículu p’Asturies.com la historia d’esti sellu pa “rescatar una pequeña parte de la historia d’Asturies y del movimientu autonomista asturianu”. Reflexa l’apaición d’una referencia a la so esistencia’l 20 de xunetu del 1906 na portada del periódicu madrilanu de tendencia lliberal ‘El Globo’ y les diferentes repercusiones que xeneró n’otres cabeceres nos díes siguientes.

Tamién rellata cómo dio col sellu y cuenta la so suposición de que’l manuscritu que lu acompañaba pudiera pertenecer a Leopoldo Alas Argüelles, que más tarde sería rector de la Universidá d’Uviéu. Por último, contestualiza la so apaición y distribución, que coincide cola consolidación de los movimientos nacionalistes catalán y vascu.

Pa consultar l’artículu al completu, calca equí.