Un réxime nuevu pa crear empreses en 24 hores

Dende abril d´esti añu una regulación nueva permite montar una empresa nun tiempu bien curtiu Ye una nueva forma societaria conocía pol nome "Sociedá Llimitada Nueva Empresa" y ente les sos característiques destaquen los perinteresantes beneficios fiscales que tien. L´oxetivu d´esta nueva ferramienta ye la de da-yos puxu a los nuevos proyeutos empresariales asina como da-yos un pequeñu emburrie a los emprendedores.

Nueva Empresa (NE) ye un nuevu marcu xurídicu reguláu pol Estatutu de la Nueva Empresa. Esta nueva regulación entamó a furrular n'abril d´esti añu y tien el so ámbitu llegal nes sociedaes llimitaes. El recorte nos trámites de llegalización de la sociedá mercantil, la esixencia d´una contabilización cenciello y una riestra d´ayudes publiques pa la so costitución son delles ventayes d´esti nuevu proyeutu entamáu pola Alministración. Vamos entamar un pequeñu analís d´esta nueva forma societaria polo que tien de novedá.

La Sociedá Llimitada Nueva Empresa pue costituise por un másimu de cinco socios, que tienen que ser toos persones físiques, polo que nenguna otra sociedá mercantil puede participar nel accionaría d´una empresa d´esti tipu. El capital social mínimu necesariu ye del 3.012 euros y nun puede sobrepasar los 120.202 euros de capital social. Amás, les aportaciones dineraries tienen de tar desembolsaes na so totalidá. Ente los beneficios fiscales destaquen l'aplazamientu del pagu del Impuestu sobre Tresmisiones Patrimoniales (el deriváu de costituyir la empresa polo que tien que ser el d'operaciones societaries) por un añu y ensin falta de da-y garantíes a l´Alminstración. Tamién hai la posibilidá de prorrogar el pagu d´impuestos d'hasta dos exercicios fiscales tamién ensin falta de da-y garantíes a l´Alministración. Les retenciones o ingresos a cuenta del IRPF del primer añu de la empresa tamién pueden ser en pagu prorrogáu o fraccionáu. A la contra, estos aplazamientos o fraccionamientos lleven interés de demora a favor de l´Alministración Tributaria. Otramiente, l'Impuestu de Sociedaes pa esti tipu novedosu d´empreses vien acompañáu de delles deducciones por gastos o inversiones.

Otra perimportante novedá de Nueva Empresa ye´l tiempu necesariu pala so costitución. De fechu puede montase una d´estes empreses hasta en 24 hores, en comparanza colos casi tres meses d´anguaño. Esti nuevu formatu d´empreses empobínase sobremanera alos autónomos, y ye que l'Estatutu Nueva Empresa ye en realidá un revueltu de les ventayes de los autónomos y les de les sociedaes llimitaes. Pa crear una d´estes empresas hai que dir a una ventaniella única onde informen, asesoren y tramiten tola documentación necesaria. N´Asturies sólo hai una ventaniella única, asistiada n´Uviéu, na Cámara de Comerciu. La otra posibilidá ye de facer parte del trámite al traviés d´Internet.