Un retratu carauterizáu como'l xeneral Riego, recompensa p'Antón García pol Malory

La tertulia entreguina escoyó 'Memoria de Tuña' como'l meyor llibru del 2019.

El vienres celebróse nel chigre Tom Malory la entrega a Antón García del renocimientu por ser merecedor del premiu que dende'l 2012 vien entregando a los autores del títulu lliterariu más destacáu del añu anterior. La recompensa, una medaya conmemorativa y una ilustración d'Alfonso Zapico, que fixo un retratu del escritor carauterizáu como'l xeneral Rafael del Riego, natural como él de Tuña.

Falláu en setiembre, nun pudo facese l'actu pol premiu de la Tertulia Malory del 2019 hasta agora por cuenta la pandemia. D'esta forma, García incopora'l so nome a un llista d'autores qu'abrió Xabiero Cayarga, por ‘La neve del cuquiellu’ (2011), al que siguieron Ruma Barbero, por ‘La Chelita’ (2012); Milio Rodríguez Cueto, por ‘Carne de melandru’ (2013); Consuelo Vega, por 'Más espeso que l'agua' (2014); Ángeles Carbajal, por 'L'aire ente la rama' (2015); Francisco 'Paco' Álvarez, por 'Lluvia d'agostu' (2016); Raquel F. Menéndez, por 'El llibru póstumu de Sherezade' (2017); y David Artime, por 'Incorrectos' (2018).

Na semeya, García tien el retratu na plaza frente al Tom Malory xunto con miembros de la tertulia lliteraria.