Un renováu Telecable Xixón abre una OK Lliga femenina con dos equipos asturianos

|
Telecable Xixón en pretemporada

El Cuencas Mineras acompaña na categoría al club con meyor palmarés del país, qu'estrena patrocinador, recupera a Natasha Lee y buscará ganar la primer la Intercontinental.

El domingu, a les 12 hores nel pabellón de Mataxove, el Telecable Hockey Club abre col Reus una temporada nueva na que les xixoneses tornen a aspirar a los trés títulos que yá tienen en propiedá y al de creación nueva, la Copa Intercontinental, que n'avientu va enfrentar n'Arxentina a equipos europeos y sudamericanos. Pa ello, el club de La Calzada presenta una amplia renovación, col retornu del téunicu Fernando Sierra y de Lee.

La marcha de la goliadora María Díaz 'Peke' y d'Ana Casarramona, dos baxes bien importantes, ye cubierta cola internacional xixonesa y la gallega María Sanjurjo, promesa de 18 años procedente del Liceo. Pal partíu del domingu, Sierra cuenta cola única dulda de la portera Txiki Morera.

Enantes del comienzu del choque, el club xixonés va recibir el troféu de campeón de la OK Lliga de la temporada pasada, na que tamién quedó campeón d'Europa. Esti títulu va permitir al Telecable participar na primer Intercontinental xunto col Benfica, subcampeón européu, y los arxentinos Concenpción de San Juan –equipu anfitrión– y l'Andes Talleres de Godoy Cruz, primeru y segundu na Sudamericana, pa lo que les xixoneses han de buscar financiación pal desplazamientu al nun tener presupuestada esta competición de creación nueva.

La estrena faise esperar

El debú del segundu equipu asturianu de la OK Lliga femenina de ḥoquei sobre patinos va facese esperar una selmana. El Cuencas Mineras debería enfrentase esta selmana en Voltregà, pero va retrasase al 24 de payares p'aprovechar el viaxe a Catalunya pa enfrentase al Generali HC Palau Plegamans.

El sábadu 27, na segunda xornada, el club ḷḷenizu, que va xugar los sos partíos como llocal en Mieres, va disputar el so primer partíu na categoría na cancha del Bigues i Riells a les 21 hores. El primer choque en casa ta previstu na xornada 4, el 18 de payares a les 12.30 hores, col Vilanova.

Na semeya, formación del Telecable, entovía ensin les trés internacionales con España nel Européu (Lee, Sara González y Marta Piquero), nel partíu últimu de la pretemporada.

Contador Estadistiques