Un positivu y ausencia de muertes, datos de COVID-19 d'esti llunes

Un total de 31 persones recibieron l'alta epidemiolóxica a lo llargo de la xornada.

Tres dos xornaes siguíes ensin contaxos, ayeri rexistróse un positivu nuevu tres el procesamientu de 1.067 muestres por PCR pa la determinación de la COVID-19. Hasta'l momentu, 2.438 ciudadanos contraxeron n'Asturies la enfermedá causada pol coronavirus SARS-CoV-2.

La bona noticia foi l'ausencia de finaos depués que'l domingu hubiera una muerte. Asina, el númberu total de persones que perdieron la vida nel país queda en 332.

En planta rexistráronse dos ingresos más, polo qu'anguaño hai 9 pacientes, mentes que na UCI siguen 12. Otra manera, 1.940 yá recibieron l'alta epidemiolóxica tres les 31 curaciones d'ayeri.