Un pesqueru gallegu naufraga frente a Xagón

Los ocho tripulantes salváronse. El Colectivo Ecologista de Avilés reclama midíes pa torgar la contaminación por combustible.

Un pesqueru con base en Santiago de Celeiro de nome 'Serenín' naufragó esta madrugada na cercanía del puertu d'Avilés, frente a Xagón, al perder el motor por un golpe previsiblemente con una roca del fondu. El Centru de Salvamentu Marítimu en Xixón movilizó pasada la medianueche al helicópteru Helimer 206 y otros barcos asitiaos na zona, siendo rescataos ilesos los marineros por una llancha de práuticos.

El Colectivo Ecologista de Avilés solicitó a les autoridaes qu'intervengan na zona pa evitar la fuga de combustible y aceite del barcu. Los restos del naufraxu podíen vese na sablera gozoniega, pero "nenguna midida pa torgar la fuga de los productos petrolíferos".

"Estos derrames de combustible pueden suponer, de nun retirarse y controlase a tiempu, un importante impautu ecolóxicu y, consecuentemente, socioeconómicu de la contaminación producida", alvierten. Tamién piden retirar dichos restos "pa que cuando xuba otra vuelta la marea nun los vuelva a llevar mar adientro col consiguiente impautu y riesgu pa otres embarcaciones d'estos elementos del barcu fundíu".

Na semeya, restos del naufraxu en Xagón.